തൊടുപുഴ: ലഹരി ഉപയോഗം പുറത്തറിയിച്ചതിന്റെ പേരില് ക്രൂരമായി മര്ദിച്ച് വിദ്യാര്ഥിയുടെ ജനനേന്ദ്രിയം തകര്ത്ത കേസില് ആരോപണ വിധേയരായ രണ്ടു പേരെ പോലീസ് അറസ്റ്റു ചെയ്തു. എറണാകുളം പിറവം കല്ലുമാരിയില് അക്ഷയ് സജു (18), അമ്പലവയല് നെച്ചിക്കാട്ടുകുഴി ഗൗതം കൃഷ്ണ (18) എന്നിവരെയാണ് തൊടുപുഴ പോലീസ് അറസ്റ്റ് ചെയ്തത്. ഇവരെ കാക്കനാട് ബോര്സ്റ്റല് സ്കൂളിലേക്ക് 14 ദിവസത്തേക്കു റിമാന്ഡ് ചെയ്തു.
കേസില് പ്രധാന കുറ്റാരോപിതനായ പ്രായപൂര്ത്തിയാകാത്ത വിദ്യാര്ഥിയെ പോലീസ് കോട്ടയം തിരുവഞ്ചൂരിലെ ജുവനൈല് ഹോമിലാക്കി. ഈ വിദ്യാര്ഥിയെ നേരത്തെ പോലീസ് കസ്റ്റഡിയിലെടുത്ത് ജുവനൈല് ജസ്റ്റിസ് ബോര്ഡില് ഹാജരാക്കിയിരുന്നു. പിന്നീട് മാതാപിതാക്കള്ക്കൊപ്പം വിട്ടയച്ചെങ്കിലും ഇന്നലെ വീണ്ടും ഹാജരാക്കണമെന്ന് നിര്ദേശിച്ചിരുന്നു. ഹാജരായപ്പോള് ജുവനൈല് ഹോമിലേക്ക് അയയ്ക്കുകയായിരുന്നു.
കേസിന്റെ ഗൗരവവും കുറ്റാരോപിതന് നടത്തിയ ക്രൂരതയും പരിഗണിച്ചാണ് നടപടി. കൂടാതെ കുറ്റാരോപിതന്, പരിക്കേറ്റ വിദ്യാര്ഥിക്ക് ഇന്സ്റ്റഗ്രാമില് വെല്ലുവിളി രൂപത്തിലുള്ള സന്ദേശവും അയച്ചിരുന്നു. ഇതും കൂടി കണക്കിലെടുത്താണ് നടപടി. ഗൗതമിനും അക്ഷയ്ക്കുമെതിരെ ആദ്യഘട്ടത്തില് പോലീസ് കേസെടുത്തിരുന്നില്ല.
എന്നാല് ഇവരും അക്രമത്തില് പങ്കാളികളാണെന്ന് പിന്നീട് ആരോപണം ഉയര്ന്നു. ഇതോടെ പോലീസ് ഇവരെ കസ്റ്റഡിയിലെടുത്ത് മണിക്കൂറുകളോളം ചോദ്യം ചെയ്തു. തങ്ങള് വിദ്യാര്ഥിയെ മര്ദിച്ചിട്ടില്ലെന്നാണ് ഇവര് മൊഴി നല്കിയത്. എന്നാല് അക്രമത്തില് ഇവരും പങ്കാളികളാണെന്ന് വ്യക്തമായതോടെ അറസ്റ്റ് രേഖപ്പെടുത്തുകയായിരുന്നു.
Deepika
E-paper LOGIN
LOGIN
